Turismo de Galicia promove a oferta turística galega en Francia, a través do ‘Salon mondial du tourisme’ de París
A capital francesa acolleu esta cita turística anual á que Turismo de Galicia acudiu para expoñer as principais novidades do destino no cuarto mercado emisor máis importante para a Comunidade galega
Máis do 8% dos turistas internacionais que visitaron Galicia no pasado ano 2016 procedía de Francia
Un grupo de sete empresarios galegos tiveron a oportunidade de manter reunións de traballo con operadores turísticos franceses no marco deste certame
A cidade de París acolleu a 42ª edición do certame ‘Salon mondial du Tourisme” e Turismo de Galicia participou por segundo ano consecutivo para promover a oferta turística galega e as principais novidades do destino Galicia para o ano 2017 no cuarto mercado emisor máis importante para a Comunidade galega.
O ‘Salón mondial du Tourisme’ de París, celebrouse no recinto Parc des expositions Porte de Versailles e nos últimos anos tense convertido nun dos principais certames turísticos de Francia, canto á afluencia de público e concorrencia de operadores turísticos.
Así, Turismo de Galicia participou nesta feira cun recinto dentro do apartado dedicado a España desde o que difundirá os valores turísticos da Comunidade galega e manterá reunións cos axentes de viaxes deste importante mercado emisor.
Neste sentido, no espazo galego, un grupo de sete empresarios do sector turístico galego participaron tamén no certame baixo a coordinación da Cámara de Comercio de Santiago ao obxecto de manter encontros profesionais con operadores turísticos franceses.
Demanda turística francesa
Con máis de 117 mil viaxeiros aloxados e preto de 200.000 pernoitas rexistradas nos establecementos regrados de Galicia, o mercado francés representou en 2016 o 8,6% do total internacional. Francia situouse, así, no cuarto lugar en orde de importancia por detrás de Portugal, Alemaña e Italia.
A demanda turística francesa en 2016 presentou un comportamento positivo superando nun 5,5% a cifra de viaxeiros aloxados e nun 12,7% o nivel de pernoitas do anterior ano 2015.
