Turismo de Galicia promoveu os recursos da Comunidade nun dos festivais culturais máis relevantes de Alemaña, o Festival Museumsuferfest de Frankfurt. Como en anos anteriores, a Xunta participou neste evento no que España contou cun recinto propio, o chamado Spaniem am main. Trátase do festival máis importante desta cidade alemá.

Ao longo de tres días, os visitantes puideron gozar de numerosas representacións artísticas, actuacións de música en vivo nos escenarios montados na ribeira do río, especialidades culinarias internacionais, stands de información, ademais de ter a oportunidade de visitar os máis de 20 museos que dan nome o evento e que ofertan actividades toda a semana.

España é o único pais cun recinto propio, composto por carpas informativas das diferentes comunidades participantes, así coma un escenario con programación cultural e música en directo. Galicia contou coa actuación do grupo musical Anxo Lorenzo Trío & Nastasia Zürcher, que realiza tres pases diarios, ademais de ofrecer información turística da Comunidade.

Máis de 77.500 viaxeiros alemáns

O mercado alemán é un dos máis importantes para o turismo galego. No que vai de ano, mostrou un comportamento positivo, cun incremento da demanda do 6,7%. É o segundo mercado internacional con máis peso na nosa Comunidade, con máis de 77.500 viaxeiros aloxados e preto de 120.000 pernoitas. De feito, supón preto do 11% do turismo estranxeiro.