A ocupación hoteleira en Galicia segue a bater récords e por primeira vez son superados os 12 millóns de noites de xaneiro a novembro
A Comunidade galega, con preto de 6,3 millóns de visitantes aloxados en establecementos turísticos, rexistra os mellores datos da serie histórica
Nos primeiros once meses deste ano, Galicia rexistra preto de 6,3 millóns de viaxeiros aloxados e máis de 12 millóns de noites no conxunto dos establecementos de aloxamento, segundo os datos de ocupación do INE – hoteis, pensións, apartamentos turísticos, cámpings, turismo rural e albergues-, o que supón as cifras máis elevadas da serie histórica deste rexistro.
Con estes datos, Galicia supera nun 41% os rexistros do mesmo período do pasado ano para situarse novamente por riba do nivel previo á pandemia, cun incremento do 3,0% no nivel dos primeiros once meses de 2019.
Galicia presenta unha porcentaxe de recuperación do 95% neste período de once meses e volve situarse nunha posición alta canto á recuperación da súa demanda turística, mellorando en oito puntos a distancia respecto da media do conxunto do Estado.
Neste período, todas as tipoloxías superan con creces os niveis de demanda do pasado ano. Os datos acumulados ata novembro reflicten que o 72% da demanda corresponde ao segmento hoteleiro, mentres que o 28% restante fica no aloxamento extrahoteleiro.
Por outra parte, os primeiros once meses do ano o 75% da demanda corresponde ao turismo de ámbito nacional –que engloba ao interno e ao que procede das restantes comunidades autónomas- mentres que o 25% restante é internacional. Ambos segmentos superan de forma notable as cifras do pasado ano, nun 23% o nacional e en máis do dobre o internacional.
Ocupación por provincias
Por provincias, nos 11 primeiros meses do ano, rexístrase un comportamento positivo da demanda turística nas catro provincias galegas, con incrementos que roldan o 30% en Lugo, Ourense e Pontevedra, e superan o 40% e A Coruña.
Polo que respecta ao mes de novembro, a nivel global rexistráronse neste mes preto de 300.000 viaxeiros aloxados e 570.000, cifras que colocan a Galicia en máximos da serie histórica.
Nunca antes a nosa comunidade conseguira achegarse aos 300.000 viaxeiros aloxados e superar as 550.000 noites neste undécimo mes do ano, no conxunto da oferta de aloxamento rexistrada polo INE.
