Como indicou, Galicia conta co aval da experiencia na xestión de itinerarios culturais como o Camiño de Santiago desde hai máis de 30 anos e o feito de que presida a Federación Europea do Camiño de Santiago fai que o Goberno autonómico “sexa idóneo para transmitir neste itinerario experiencia na xestión, desenvolvemento de plans estratéxicos, medición de resultados e coordinación”.

 

Salientou que a xestión dun itinerario cultural como este supón un “gran reto e unha magnífica oportunidade” para os territorios polos que pasa polo seu atractivo turístico e a súa capacidade de xerar unha industria local de servizos para cubrir as necesidades dos visitantes. 

 

Recordou, ademais, que ademais de xestionalo desde unha perspectiva tanxible a través dos bens históricos conservados, tamén é importante ter en conta os bens intanxibles como tradición orais, usos sociais, ríos, actos festivos… Neste sentido indicou a importancia da investigación histórica, a coordinación institucional e tamén a implicación da sociedade civil para o impulso cultural e turístico deste tipo de itinerarios e a súa importancia para establecer nexos de unión con outros territorios.