O destino turístico España Verde recibiu o último ano case 17 millóns de visitantes, que se traduce nun ritmo de crecemento do 17%, confirmando así a relevancia desta proposta integradora das ofertas turísticas de Galicia, Principado de Asturias, Cantabria e Euskadi. O director de Turismo de Galicia, Xosé Merelles, presentou esta marca na cidade de Porto ante o público portugués na procura de incrementar o número de turistas do país luso.

A xuízo de Xosé Merelles, “a importancia da España Verde como destino radica, principalmente, na diferenza da súa oferta turística con respecto a outras propostas do sur e do mediterráneo español”. Neste sentido, salientou que os rexistros alcanzados o pasado ano superan en 4 millóns de visitantes os de 2019 -prepandemia- procedentes sobre todo de Europa, Reino Unido e Estados Unidos.

Precisamente, nesta “experiencia turística orixinal”, destacan sobre todo valores coma a  paisaxe, a contorna mariña, a gastronomía, o patrimonio natural e arquitectónico e as xentes, conformando unha proposta diferenciadora e de gran atractivo para mercados afastados coma o norteamericano ou asiático.

Produtos España Verde

O director de Turismo de Galicia referiuse ao Gran Roteiro da España Verde e ao Corredor de Ecoturismo como produtos turísticos de carácter transversal que recorren as catro Comunidades.  Sobre o Gran Roteiro da España Verde, Xosé Merelles salientou que permitirá ao viaxeiro descubrir lugares icónicos como a cidade de Donostia-San Sebastián, o Museo Guggenheim de Bilbao, as adegas da Rioxa Arabesa, a baía de Santander, as covas de Altamira, os Picos de Europa, Oviedo, as vilas mariñeiras do Cantábrico, entre outros.

En relación co Corredor de Ecoturismo da España Verde, o director de Turismo de Galicia destacou que se trata “do primeiro destas características en todo o territorio nacional e o maior de toda Europa”. Ese produto propón a visita a 26 espazos naturais protexidos, vertebrando así toda a cornixa cantábrica con actividades de respecto á natureza, á súa conservación e ao desenvolvemento das economías locais.

A estas dúas propostas hai que sumar, dixo Xosé Merelles, a oferta relacionada co turismo deportivo (no que destaca o golf ou o surf), a ornitoloxía, ou o termalismo, que tamén ocupan un lugar importante dentro de toda a oferta da España Verde.  “E, por suposto, o produto máis identitario e recoñecido internacionalmente da España Verde: o Camiño de Santiago do Norte”, concluíu.