Galicia recibiu a visita dunha delegación de nove operadores turísticos da zona de Chicago, que ata o venres 11 percorrerán unha selección de localizacións na comunidade. O obxectivo é familiarizar ao grupo cos atractivos da rexión, para así contribuír a facilitar a súa promoción nun dos principais mercados emisores de turismo, como é Estados Unidos. A Xunta enmarca esta viaxe no plan de accións de promoción de Turismo de Galicia que inclúe 130 iniciativas en 30 mercados e conta cun investimento de 13M€.

A viaxe articúlase en dúas partes. Nunha primeira hospedaranse en Santiago de Compostela, desde onde se moverán polas provincias de A Coruña e Pontevedra. Na segunda metade da viaxe, a partir do mércores 9, centraranse na zona da Ribeira Sacra. Así, nos cinco días de estancia en Galicia, terán a oportunidade de coñecer Pontemaceira, Pontevedra, Combarro e Tui, así como destacadas mostras do patrimonio arquitectónico e histórico galego, entre elas o Pazo de Faramello, o de Oca ou o de Rubianes, o Parador de Baiona, Santa Trega ou os mosteiros de San Pedro de Rochas, San Estebo e Santa Cristina de Ribas de Sil. Poderán experimentar a calidade da gastronomía e coñecer a viticultura da terra, con visitas a restaurantes e adegas.

O turismo internacional estase a converter nun dos principais activos da demanda turística de Galicia. No ano 2024, as persoas procedentes de países de fóra de España alcanzaron o 30% do total de visitantes na rexión, o que apunta a un crecemento constante: en 2021 era o 14% e en 2022, o 25%. Estados Unidos supón, ademais, o segundo mercado emisor en termos de aloxamento. En relación ao Camiño de Santiago, Estados Unidos destaca, con  38.034 persoas, como o principal país de orixe dos peregrinos que recolleron a súa Compostela en 2024.

As viaxes de familiarización son unha das principais ferramentas, a través da que Turismo de Galicia busca dar a coñecer os atractivos da rexión entre os principais axentes de promoción turística. A Xunta ten previsto realizar este ano ao redor de medio cento de viaxes a Galicia para afondar no coñecemento dos diferentes recursos e produtos turísticos, tanto para operadores como para xornalistas e creadores de contido. Algunhas destas iniciativas son as organizadas en colaboración coa OET de Os Anxeles, co grupo alemán Dertour ou coa OET da Haia.