Responsables de empresas turísticas do sector termal recibiron formación específica nunha xornada técnica, organizada por Turismo de Galicia, sobre as dúas liñas de axudas convocadas para a creación de novos establecementos termais e rehabilitación e reforma dos existentes. O director de Turismo de Galicia, Xosé Merelles, participou nesta acción formativa que tivo lugar no Centro Superior de Hostalería de Galicia, na que se explicaron os detalles das dúas convocatorias que supoñen unha inxección de financiamento dirixida ao sector termal de case 8M€.

As dúas liñas de axuda pretenden innovar e modernizar o parque inmobiliario e os servizos termais que forman parte da oferta desta modalidade turística da Comunidade galega, ao tempo que se avanza en sostibilidade neste tipo de atención. As dúas convocatorias forman parte do Plan de Turismo Termal 2025-2028 que propón catro accións estratéxicas con 26 medidas e un orzamento de máis de 10M€. O prazo das convocatorias está aberto ata o 18 de xullo deste ano.