O director de Turismo de Galicia, Xosé Merelles, visitou a alfombra floral elaborada pola Federación de Asociacións de Alfombristas Galegos de Arte Efémera na compostelá Praza da Inmaculada, nun lateral da Catedral de Santiago, con motivo das festas do Apóstolo 2025.

Xosé Merelles eloxiou a laboriosidade e o traballo empregado polos profesionais e destacou que “esta mostra se suma aos atractivos da cidade estes días das festas do Apóstolo, converténdose nun punto de visita máis para os milleiros de visitantes da cidade”. A mostra floral efímera foi confeccionada por 40 alfombristas da comunidade e ocupa unha superficie de 12 x 8 m. Está dedicada a Isaac Díaz Pardo.