O director de Turismo de Galicia, Xosé Merelles, participou no encontro de Tecnohotel Ontour Galicia que tivo lugar no Hotel Porta do Camiño. Alí,  Xosé Merelles eloxiou o traballo do sector turístico galego onde a calidade, a competitividade e a profesionalidade dos establecementos de aloxamento fixeron que elevasen os seus ingresos entre xaneiro e agosto deste ano a 312,9M€.

O director de Turismo de Galicia reflexionou ademais sobre o crecemento turístico que está a vivir a comunidade galega que “está sendo sostido, planificado e ordenado”, con chegadas de visitantes repartidas durante todo ano con incrementos nos meses de xaneiro xaneiro (+4,3%), maio (+4%) e xuño (+6,7%). Ademais, puxo en valor a internacionalización do destino como outro dos eixos da política da Xunta no ámbito turístico e subliñou que o mercado internacional supón ao redor do 30% do total de visitantes.