O director de Turismo de Galicia, Xosé Merelles, mantivo un encontro coa directora de Marketing do grupo internacional con sede en Alemana, TUI Group, Fernanda Vaz de Lima, no marco da Feira Internacional de Turismo de Berlín (ITB). Durante a xuntanza, Xosé Merelles trasladoulle as potencialidades do destino Galicia e a directiva amosou a intención do grupo de deseñar un programa de City Breaks para a cidade de Santiago de Compostela dirixido ao mercado británico.

Neste sentido, o director de Turismo de Galicia destacou que precisamente Reino Unido foi o que máis medrou o pasado ano cun incremento de turistas do +14,8% e trasladoulles tamén os recursos das outras cidades galegas, algunhas delas próximas a aeroportos con conexión directa a Reino Unido. Ademais, Xosé Merelles tamén lle explicou as oportunidades que ofrecerá a celebración do Xacobeo 2027 e Fernanda Vaz de Lima apostou por deseñar novas experiencias vinculadas co Camiño de Santiago.

TUI Group é un grupo turístico cunha ampla gama de actividades entre as que se atopan turoperación, distribución, xestión de aeroliñas, hoteis, cruceiros e xeración de experiencias; ten en Alemaña e desenvolve a súa actividade a nivel internacional. Ademais de ocuparse do negocio aéreo nos mercados emisores, tamén deseña actividades en destino que inclúen hoteis, cruceiros, actividades e excursións, transfers e experiencias.

Durante a súa participación na ITB de Berlín, o director de Turismo de Galicia mantivo varios encontros con turoperadores e axentes turísticos internacionais como Everhardt Travel, Boldest e Dertour, nos que constatou o interese que esperta o destino Galicia nos principais mercados europeos, así como as oportunidades que se derivan do próximo Xacobeo 2027.