O director de Turismo de Galicia, Xosé Merelles, acompañado pola xefa da Área Termal, Belén Gómez Quevedo, mantivo nunha reunión con varios directivos da industria hoteleira do Perú e a Arxentina que se atopan en Galicia para coñecer a proposta de turismo termal da comunidade galega e tamén na procura de asesoramento sobre o seu desenvolvemento.

Durante o encontro, Xosé Merelles destacou que Galicia é a 1ª potencia termal de España -co 20% da oferta do país- e o 2º destino europeo con maiores reservas. Ademais, puxo en valor o compoñente desestacionalizador e diversificador da oferta turística, así coma o aporte cara unha proposta do destino que redunda en autenticidade e singularidade. Neste sentido, subliñou a aposta do Goberno galego pola innovación, pola saúde e pola formación dos profesionais para avanzar ademais na difusión do termalismo nos tratamentos médicos.