Segundo os datos feitos públicos polo Instituto Nacional de Estadística (INE), neste primeiro cuadrimestre do ano, Galicia rexistrou un incremento en pernoitas e viaxeiros por riba da media nacional. Así, no mes de abril, o volume de pernoitas incrementouse un 49,9% nos establecementos turísticos regrados, o que sitúa á nosa comunidade un 25% por riba da media nacional.

Ademais, o incremento no volume de viaxeiros aloxados nos establecementos regrados da comunidade en abril deste ano, en comparación co mesmo mes de 2016, foi do 37,5%,o que supón un 13,60% máis que o incremento medio español.

Un incremento que tamén se rexistra no primeiro cuadrimestre do ano, cando Galicia tamén medra por riba da media estatal, rexistrando un incremento do volume de viaxeiros aloxados nos establecementos regrados do 7,7% ata situarse en pouco máis dun millón. Nos catro primeiros meses do ano sobe tamén o volume de pernoitas, un 8,4% neste caso, colocando o dato final en máis de 1,8 millóns no conxunto de Galicia.

Turismo internacional
En termos de mercado, e no referido ao mes de abril, o turismo internacional medra cun incremento do 23,8% a cifra de viaxeiros aloxados e nun 26,3% o nivel de pernoitas con respecto ao ano pasado. Neste caso son catro anos consecutivos de incremento do turismo internacional en Galicia neste cuarto mes do ano.

O peso do turismo internacional no mes de abril supuxo preto do 27% do total de viaxeiros aloxados e o 23% de pernoitas, cifras importantes que superan ás rexistradas en meses anteriores.

En abril, o turismo nacional tamén sobe, neste caso preto do 60% como consecuencia esencialmente dunha mellora da cifra de viaxeiros aloxados, do 43%. Este crecemento sitúa os niveis por riba dos 300 mil viaxeiros aloxados e das 600 mil noites –datos que supoñen un máximo histórico deste segmento de mercado no mes de abril–.

O comportamento dos dous segmentos de mercado reprodúcese nas dúas grandes tipoloxías de aloxamento. Así a demanda nacional sobe tanto no segmento hoteleiro coma no extrahoteleiro, en porcentaxes elevadas –un 52% no primeiro e en máis do dobre no segundo-. O turismo internacional mellora en ambas tipoloxías –un 23,7% no segmento hoteleiro e un 60,4% no extrahoteleiro-.

Subida da estadía media
Por outra parte, a estadía media nos establecementos regrados de Galicia superou en abril nun 9% o dato do pasado ano. En abril, máis do 88% da demanda turística regrada corresponde aos establecementos hoteleiros, porcentaxe que inclúe tanto aos hoteis –que representan máis do 73%- como ás pensións –con case o 15% neste caso.
O 11% restante, en cambio, sitúase no segmento extrahoteleiro, porcentaxe que reúne aos apartamentos turísticos –representan algo máis do 4% da demanda total- aos cámpings –co 2%- e aos establecementos de turismo rural –que supoñen o 5% neste caso-.

En relación coas tipoloxías de aloxamento, obsérvase neste mes de abril un comportamento homoxéneo, con variacións de diversa intensidade mais todas positivas. No ámbito hoteleiro o incremento da demanda é do 44%, porcentaxe que ascende ao 51% no caso dos hoteis, e as pensións amosan subas do 16%.

No ámbito extrahoteleiro supéranse en máis do dobre as cifras de abril de 2016, circunstancia que afecta ás tres tipoloxías consideradas. A dinámica positiva é, por tanto, transversal a todas as modalidades.