A Banda de Música de Catoira e a Banda de Música Popular de Moaña "Airiños do Morrazo" foron as protagonistas a pasada fin de semana do ciclo de concertos “Musica no Camiño”, organizado por Turismo de Galicia en colaboración coa Federación Galega de Bandas de Música Populares.

O ciclo comprende un total de 24 actuacións durante as fins de semana e festivos dos meses de xuño, xullo e agosto. De feito, ata agora xa se celebraron no marco desta iniciativa un total de 19 concertos neste verán que tiveron grande éxito.

O lugar de celebración é na Praza de Praterías de Santiago de Compostela, a partir das 20:30 horas, unha vez rematada a Misa do Peregrino.

Os concertos teñen unha duración aproximada de sesenta minutos e na súa maior parte interpretan obras de autoría ou temática galega para contribuír a difundir a cultura galega e a promover as bandas de música populares de Galicia entre os peregrinos que acadan a etapa final do Camiño.

Deste xeito, os camiñantes tamén poden deleitarse con estes concertos sen ter que realizar ningunha reserva previa e sen ningún tipo de custo. Trátase así dun xesto para gratificar o esforzo e o sacrificio realizado durante a Ruta Xacobea.

O próximo fin de semana será o último deste ciclo de concertos que rematará coas actuacións da Banda de Música Unión de Lantaño, a Agrupación Musical da Limia e a Banda Municipal de Música de Boiro o venres 19, sábado 20 e domingo 21 de agosto respectivamente.