Turismo de Galicia mantén unha xuntanza cunha delegación de Wakayama para avanzar nos actos do 25 aniversario do irmandamento entre o Camiño de Santiago e o Camiño de Kumano Kodo
Nava Castro reuníuse coa delegación de Prefectura de Wakayama na sede da Axencia de Turismo
A directora de Turismo de Galicia, Nava Castro, e o responsable da S.A Xacobeo, Ildefonso de la Campa, mantiveron un encontro cunha delegación da prefectura de Wakayama para avanzar nos actos de celebración do 25 aniversario do irmandamento entre o Camiño de Santiago e Camiño de Kumano Kodo.
Durante o encontro, propúxose levar a cabo unha serie de accións conxuntas entre Galicia e a prefectura de Wakayama para a celebración do aniversario do acordo entre a Xunta de Galicia e a prefectura de Wakayama para o irmandamento entre ambos Camiños. Ademais, no 2024, o Camiño de Kumano Kodo celebrará o 20 aniversario da declaración como Patrimonio da Humanidade por parte da UNESCO.
O Camiño de Santiago e o Camiño de Kumano Kodo son dúas das rutas de peregrinación máis importantes do mundo, protexidas pola Unesco co recoñecemento de Patrimonio Mundial. As rutas irmandáronse en 1998, dando comezo a unha intensa relación que contribuíu a incrementar os lazos entre os país Nipón e Galicia.
Esta reunión forma parte do traballo levado a cabo pola Xunta de Galicia para impulsar as relacións internacionais apoiando e reforzando os contactos con administracións e axentes estranxeiros para reforzar así a difusión da cultura xacobea no mundo.