Os viaxeiros aloxados nos establecementos regrados de Galicia medraron un 4,5% con respecto dos dez primeiros meses de 2012
Entre xaneiro e outubro deste ano Galicia recibiu 3,4 millóns de viaxeiros que realizaron 7,3 millóns de pernoitas, un 1,2% máis que as rexistradas no mesmo período do ano pasado. Trátase da segunda taxa máis elevada de crecemento do estado no conxunto da oferta de aloxamento, só por detrás de Murcia.
Nos dez primeiros meses o turismo internacional aloxado nos establecementos galegos xa acada cotas do 25,3% de viaxeiros aloxados. Os turistas internacionais medraron nese período un 11% e só en outubro subiron un 8,9% acadando o máximo histórico da comunidade nun mes de outubro, con máis de 83 mil viaxeiros.
Entre os meses de xaneiro e outubro o conxunto dos establecementos de oferta regrada de Galicia –hoteis, pensións, casas de turismo rural, apartamentos turísticos e cámpings- recibiron un total de 3.421.310 viaxeiros que realizaron 7.313,771 pernoitas. Isto supón, con respecto do mesmo período do ano pasado, unha suba do 4,5% na cifra de turistas e do 1,2% na de noites. A suba no conxunto do Estado foi do 0,5% en viaxeiros e do 1% en pernoitas.
No que vai de ano, Galicia rexistra a segunda taxa máis elevada de crecemento dos viaxeiros aloxados en establecementos regrados, só Murcia sube máis. Nos hoteis e pensións de Galicia a cifra de turistas subiu un 5,2% de media e nos apartamentos e cámpings, un 2,6% e 2,7% respectivamente.
É especialmente relevante o crecemento do turismo internacional neste período xa que medrou a cifra de viaxeiros estranxeiros aloxados nos dez primeiros meses do ano a respecto do mesmo período de 2012 un 11%. As pernoitas de viaxeiros internacionais tamén subiron un 8%. Isto fai que os turistas estranxeiros supoñan xa en Galicia o 25,3% do total de aloxados. Este segmento acada así o máximo histórico con máis de 865 mil viaxeiros e 1,5 millóns de pernoitas.
De igual modo, se se teñen en conta só os datos do mes de outubro, Galicia recibiu máis de 83 mil viaxeiros internacionais que fixeron 140 mil noites en establecementos regrados de Galicia. Só en outubro o turismo internacional medra 6,1%, acada con isto unha cota nunha antes rexistrada neste mes.
Peregrinos a Santiago
No que vai de ano, os peregrinos contabilizados na Oficina de Acollida ao Peregrino de Santiago de Compostela xa rebasan en 23.202 os rexistrados entre o 1 de xaneiro e o 28 de novembro do ano pasado. En total, máis de 214 mil peregrinos, máis da metade deles estranxeiros, recolleron a Compostela no vai de ano, isto é, un 12,16% máis que polas mesmas datas de 2012.
Tamén a rede de albergues rexistrou subas de máis de un 1% na cifra de pernoitas. Máis de 329 mil noites se rexistraron nos albergues da rede pública do 1 de xaneiro ao 31 de outubro deste mesmo ano.
Gasto turístico
O Instituto de Estudos Turísticos ven de facer pública a Enquisa de Gasto Turístico –Egatur- para o mes de outubro que mide o gasto que realizan en España os visitantes non residentes. O gasto total dos turistas estranxeiros en Galicia no mes de outubro foi de 83.924.062 euros, o que implica unha suba a respecto de outubro de 2012 do 10,6%. Entre xaneiro e outubro o gasto turístico dos estranxeiros supuxo 657.464.187 euros, un 28,7% máis que nos dez primeiros meses do ano pasado.
