Turismo de Galicia participou este ano por primeira vez na feira International Luxury Travel Market (ILTM), que se desenvolveu na cidade francesa de Cannes.

Trátase do principal mercado turístico mundial especializado na oferta relacionada coas compras e os produtos especiais, onde Turismo de Galicia fixo especial fincapé na promoción de ‘Viños e camelias’, a gastronomía e as posibilidades que ofrece a Comunidade galega para o turismo de compras.

Así mesmo, nesta feira leváronse a cabo entrevistas personalizadas cos operadores turísticos especializados, de xeito que os representantes de Turismo de Galicia mantiveron preto de 50 xuntanzas de traballo ao longo dos catro días de feira.

‘Viños e camelias’
Dentro do ámbito deste certame, un dos produtos turísticos galegos que máis se adapta é ‘Viños e camelias’, unha combinación de enoturismo coa ‘Ruta da camelia’, onde os visitantes poden visitar os mellores pazos e os mellores xardíns da Comunidade galega, xunto con catas e degustacións de viños con denominación de orixe.

Ademais, Turismo de Galicia promoveu a gastronomía galega de calidade, a artesanía e as posibilidades que ofrece a Comunidade galega para realizar compras.

Neste eido, cabe salientar que Galicia alcanzou este ano o meirande número de restaurantes con Estrela Michelin, con un total de 13, ademais de contar con 26 establecementos distinguidos con 37 distintivos Sol Repsol.

Turismo francés
Con preto de 90.000 viaxeiros e 130.000 pernoitas hoteleiras o mercado francés representou nos 10 primeiros meses de 2015 o 8% do total dos mercados internacionais de Galicia. Francia foi, así, o cuarto mercado por detrás de Portugal, Alemaña e Italia.