A directora de Turismo de Galicia, Nava Castro, participou no acto do pregón da Semana Santa de Santiago de Compostela, a cargo do arcebispo de Santiago, monseñor Julián Barrio. A celebración da capital estréase este ano co recoñecemento de Festa de Interese Turístico de Galicia, unha distinción que comparte coa de Betanzos, Cangas, o Santísimo Cristo de Fisterra, Mondoñedo, Paradela e Lugo, esta última recoñecida recentemente polo Consello da Xunta. A elas súmanse a de Ferrol e a de Viveiro, que ostentan o recoñecemento internacional.

A presenza da directora de Turismo no acto enmárcase no compromiso da Consellería de Cultura e Turismo por animar e recoñecer o traballo levado a cabo polas confrarías galegas ao conseguir que tradicións como estas manteñan a súa esencia e se convertan tamén en importantes atractivos para os viaxeiros.

A Semana Santa galega celebrarase este ano co maior número de festividades de interese turístico. A de Santiago de Compostela estará conformada por preto de 20 procesións na que participarán 13 irmandades que percorrerán o casco histórico da cidade. Celebraranse, ademais, os tradicionais actos litúrxicos en diferentes igrexas e o sábado 13 de abril haberá un concerto a cargo da Banda Municipal de Santiago en San Domingos de Bonaval.