07 nov 2011

Galicia, sendas para descubrir un país

Turgalicia edita Galicia, sendas para descubrir un país, un folleto turístico que persegue achegar o mundo do sendeirismo ao público en xeral.

Sendas para descubrir un país

Galicia, sendas para descubrir un país é un catálogo de referencia daqueles sendeiros que cumpren as condicións de homologación esixidas pola FEDME (Federación Española de Deportes de Montaña e Escalada) no ámbito estatal, ou a FGM (Federación Galega de Montañismo) no ámbito autonómico, e que se axustan á normativa internacional. Con esta información, a Sociedade de Imaxe e Promoción Turística de Galicia, da Secretaría Xeral para o Turismo, TURGALICIA, persegue achegar o mundo do sendeirismo ao público en xeral e incentivar aos xa afeccionados para que des cubran o rico patrimonio natural e monumental dos camiños galegos.

Sendas para descubrir un país

TURGALICIA aposta pola divulgación dos sendeiros galegos nesta nova publicación cunha tiraxe de 18.000 exemplares. A edición de 2011 deste folleto publícase simul taneamente en tres idiomas: castelán (12.000 exemplares), galego (3.000 exemplares), e inglés (3.000 exemplares).

A esencia do camiño está en descubrir o que non se coñece. Esta é unha das máximas daqueles que se aventuran a percorrer un territorio. Desde a costa ata os máis recónditos bosques frondosos, Galicia esconde prodixiosos lugares cuxo descubrimento a pé permite coñecer a súa gran riqueza paisaxística e o seu legado cultural e patrimonial.
O conxunto de rutas homologadas que recolle a guía Galicia, sendas para descubrir un país ten a capacidade de adaptarse a todas as habilidades dos amantes da natureza e do sendeirismo. Sendas e pistas forestais, antigos camiños de carros, camiños reais herdados da época romana, labirínticos carreiros nas beiras dos ríos, serras e montañas... Todos eles lugares únicos que merecen ser visitados. Pódense descubrir estes sen deiros motivados por unha aspiración deportiva e de lecer e atopar a emoción dobre da actividade e a paisaxe. Pódese buscar cultura e historia ou pódese, en fin, em paparse de beleza, para o que non hai mellor destino que Galicia.

62 propostas homologadas

Nesta nova edición do folleto Galicia, sendas para descubrir un país inclúense 4 GR e 58 PR-G. Coñecidos polas siglas GR, os sendeiros de gran percorrido son itinerarios peonís de gran lonxitude, formados pola conexión de camiños, calzadas, pistas e calquera tipo de vía de comunicación non apta xeralmente para vehículos a motor. Cada poucos quilómetros atravesan poboacións nas que poder aprovisionarse ou aloxarse en caso necesario.

Denominados PR-G, os sendeiros de pequeno percorrido galego son aqueles sendeiros de ámbito local cun trazado inferior a 50 quilómetros que, normalmente, poden percorrerse en menos de dous días. Algúns parten dun GR para achegarse a determinados puntos de valor paisaxístico, arquitectónico ou cultural que, próximos ao itinerario principal, non pertencen ao mesmo.

O propio acceso ao comezo da ruta condicionou que moitos destes percorridos comecen e terminen no mesmo punto e, nese caso, poden recibir o nome de Sendeiros Circulares. Tamén é frecuente atopar Sendeiros Ecolóxicos que, de pouca lonxitude e con inicio e final no mesmo punto, percorren espazos de gran valor natural.

Os catro GR son os mesmos que os da edición anterior, non así no caso dos PR-G. Con relación á guía anterior non se inclúen 21 PR-G e foron dados de alta 34 PR-G (polo que 24 PR-G desta nova edición xa estaban na anterior). Sendas de gran percorrido Os catro GR recollidos nesta publicación son: Panorámico de Vigo (GR53), Sendeiro das Greas (GR58), Camiño de Santiago (GR65), e Rural de Galicia (GR94).

  • Panorámico de Vigo.
    Este itinerario bordea os límites do municipio vigués pola súa vertente montañosa, ofrecendo vistas sorprendentes sobre a cidade e a súa ría. Situáronse unha serie de parques forestais en parroquias do Concello de Vigo que, provistos de todo o necesario para o lecer e o descanso, determinan o masivo éxito deste sendeiro durante a fin de semana.
  • Sendeiro das Greas.
    O máis longo dos sendeiros de gran percorrido en Galicia discorre por todos os municipios da Mancomunidade da área Intermunicipal de Vigo. Son moi numerosos os atractivos ambientais, atravesando paraxes de gran beleza onde non faltan exemplos de arquitectura popular como os muíños da Devesa, carballeira de Barragán, fraga e ribeiras de Couñago, foxo de lobos, bosque das ribeiras do río Borbén, o río Zamáns e os muíños das Maquías, marismas do Miñor, Baiona, a fraga de Oliveira...
  • Camiño de Santiago.
    A peregrinación é un acto cunha dimensión esencialmente vivencial e relixiosa. Pero hoxe en día, o Camiño é unha ruta aberta tanto a peregrinos como a camiñantes que veñen descubrir novos e atractivos elementos como son a arte, a cultura e o contacto con pobos e costumes. O Camiño de Santiago, primeiro itinerario cultural europeo, é unha viaxe de iniciación que conduce ao corazón de Galicia a través de escenarios que nos retraen á Europa medieval.
  • Rural de Galicia.
    É unha vía que comunica o mar e a montaña en dirección sur-norte. A ruta en Vigo achégase a dous promontorios coñecidos polas súas vistas panorámicas: A Madroa sobre a ría de Vigo e o castro de Negros sobre o val do río Maceiras, Redondela e a enseada de San Simón.

En canto aos Sendeiros de pequeno perco rrido galego (PR-G) a guía recolle pro postas como Galiñeiro, Aloia, Camiño Real de San Pedro de Rocas, Cambre, Mos, Fraga de Bederreira, Ribeira do Ulla, Viñedos da a Ribeira Sacra, Muñiños do Folón e do Picón... ata sumar un total de 58 carreiros localizados por todo o territorio galego, e adaptados ás necesidades de calquera persoa.

Sendeirismo no móbil

Por outra banda, TURGALICIA lanzou un proxecto pioneiro de sendeirismo empregando a tecnoloxía dos teléfonos móbiles inte lixentes. Esta nova tecnoloxía está sendo aproveitada para poñer a disposición do público información de alta calidade sobre as rutas homologadas como sendeiros de pequeno ou gran perco rrido de Galicia.

En internet, ademais dos datos e fotos que aparecen na guía impresa, pode consultarse un mapa da ruta en Google maps e páxinas web especializadas (www.wikiloc.com, www.everytrail.com, www.ikimap.com) permiten consultar, visualizar e descargarse a información xeorreferenciada das rutas galegas. A posibilidade de ver os camiños en formato 3D, de coñecer os perfís altitudinais, as distancias entre puntos de interese, e sobre todo, a descarga de toda a información aos teléfonos intelixentes converten este software nunha ferramenta esencial para a crecente comunidade de afeccionados ao sendeirismo.

A estas páxinas tamén se pode acceder desde Descargas- Sendeirismo no móbil. Desde estas webs pódense descargar os traks dos sendeiros para os móbiles intelixentes.

Arriba