Pódese realizar o percorrido partindo desde a poboación da Veiga, pola beira dereita da conca do río Xares ata a presa de Prada. Despois pódese volver pola marxe esquerda do río ata a praia dos Franceses.

A paisaxe está dominada polo encoro de Prada. Construído en 1958, supuxo a desaparición da aldea de Alberguería e a inundación das terras máis fértiles da conca do río Xares. Na actualidade, o pantano crea un  microclima propio que condiciona a climatoloxía do val. A  represa permite que A Veiga goce dunha praia fluvial perfectamente dotada para o seu uso estival.

O roteiro é suave e pode transitarse con bicicleta de montaña, incluíndo algúns tramos alternativos debidamente sinalizados. A súa dificultade radica na lonxitude da senda, pero hai múltiples alternativas para facela en varias etapas, mediante os accesos por camiños e pistas ás aldeas que circundan a ribeira.