A Igrexa parroquial de San Cristóbal de Mourentán na súa primitiva fábrica foi conventual. O actual templo é de época barroca con torre de claro gusto neoclásico sobre base cúbica. Na fachada principal sobresae a sinxela portada con arco de medio punto e sobre ela unha fornela con frontón semicircular que cobre a figura dun santo. Presenta contrafortes laterais e aínda conserva un escudo dos Sarmiento pertencente a unha capela ou enterramento dalgún membro de tan ilustra familia que eran donos do Pazo de Pombeiro. A nivel interior destacar un fermoso altar así como a bóveda de cachotaría que cobre o teito do presbiterio.

Dende a igrexa temos unha panorámica de toda a parroquia.