A Fundación Starlight, entidade de ámbito internacional vinculada ao Instituto de Astrofísica de Canarias, creou un sistema de certificación, mediante o cal son acreditados espazos que posúen unha excelente calidade de ceo e que representan un exemplo de protección e conservación. Trátase de escenarios que incorporan a observación do firmamento como parte do seu patrimonio natural, paisaxístico, cultural ou científico e, á súa vez, promoven o turismo de observación das estrelas. Este sistema de certificación está apoiado pola UNESCO, a Organización Mundial do Turismo (OMT) e a Unión Astronómica Internacional (IAU). Os Destinos Turísticos Starlight son lugares visitables que gozan de excelentes calidades para contemplar os ceos estrelados e que, ao estar protexidos da contaminación lumínica, son especialmente indicados para o desenvolvemento de actividades turísticas baseadas neste recurso natural.
Destino turístico Starlight Parque Nacional Illas Atlánticas de Galicia
O Parque Nacional Illas Atlánticas de Galicia está situado nas Rías Baixas e comprende catro arquipélagos: Cortegada e Sálvora na ría de Arousa, Ons fronte á ría de Pontevedra e Cíes, que pecha a ría de Vigo.
As espectaculares noites das illas permiten unha inmellorable contemplación do ceo estrelado. Por outra parte, grazas á súa riqueza (tanto faunística como vexetal) e á espectacularidade das súas paisaxes, estas illas constitúen un patrimonio cultural e natural único no litoral español.
O destino Starlight acolle nos seus Centros de Interpretación actividades relacionadas coa observación e protección do ceo nocturno, con dúas estacións que miden a súa luminosidade, así como accións sobre o terreo nas illas.