Turismo de Galicia

Puntos clave da ruta:

1. A ruta iníciase no porto de Ribeira (1), onde xa poderemos localizar carráns cristados e gaivotóns reais.
2. Seguimos a costa deica o peirao de Touro (2), onde habemos ver o pentumeiro común e a gaivota arxéntea.
3. A continuación, a través das praias de Castiñeiras e do Castro, chegamos a Aguiño (3). No camiño observaremos a píllara das dunas e, se cadra, a cotovía cristada e, ao chegar ao porto, o pilro tridáctilo e a gaivota cabecinegra.
4. Atravesando a poboación ata o cruce coa CP-7306, continuamos cara ao oeste deica o cruce nos Castriños (4), onde existe a posibilidade de atopar o pardal das rochas.
5. Prosigue o camiño ata as puntas Falcoeiro e Couso (5), onde habemos poder observar o pilro escuro e presenciaremos o paso de aves mariñas.
6. Desde A Graña accederemos a pé ata o observatorio ornitolóxico da lagoa de Vixán (6) para rexistrar anátidos, garzas reais e vermellas, así como tartarañas das xunqueiras.
7. Volvendo á Graña, pasando por Monte Vixán, avanzamos ata O Vilar (7), onde veremos mouchos pequenos e de orellas para, a continuación, descender cara ao aparcadoiro da praia. Dando un paseo polas pistas acondicionadas, con algo de sorte podemos albiscar o esmerillón e a curuxa das xunqueiras.
8. Camiñando cara ao nordeste chegamos finalmente á "Casa da Costa" (8), centro de recepción de visitantes do Parque Natural de Corrubedo e ademais Centro de Interpretación do Ecosistema Litoral de Galicia. No seu piñeiral poderemos observar aves forestais como a avenoiteira cincenta e o moucho de orellas.

Puntos clave da ruta:

1. Desde o acceso á lagoa de Xuño (1) camiñamos pola zona dunar cara ao oeste. No traxecto habemos observar a laverca común e a papuxa do mato.
2. Ao alcanzar a canle de desaugue da lagoa de Muro (2) localizaremos lavandeiras amarelas e limícolas sedimentadas.
3. Se seguimos ao sur, podemos observar comodamente as aves desde o observatorio da lagoa (3). Aquí é posible rexistrar a tartaraña das xunqueiras e, ocasionalmente, a garza vermella.
4. Tomando un camiño de terra cara ao piñeiral, seguiremos bordeando a lagoa polo sueste e polo sur ata o bordo da canaval (4), observando a folosa das canaveiras e a escribenta das canaveiras, que nidifica nesta zona.
5. Habemos proseguir ata chegar a unha pasarela de madeira (5) que nos levará pola cabeceira da duna ata a praia de Arealonga e as pedras da Sarrosa (6) para poder observar a mobella ártica e a gaivota arxéntea. Regrésase polo mesmo camiño ata o punto no que iniciamos a ruta.