Edificio proxectado en 1900 por Michel Pacewicz. É de estilo historicista cunhas fachadas impresionantes, sobre todo a da Praza de Compostela. Esta fachada ten un corpo sobresaínte de chafrán con forma de galería neogótica de madeira. Nas plantas primeira e segunda hai dous balcóns de pedra calada do gótico tardío e na parte superior a monumentalidade complétase cunha cornixa voada, colocada enriba de arcos apuntados. A fachada que dá a Velázquez Moreno presenta un corpo semicerrado, saínte a modo de miradoiros nas primeiras plantas e remata na terceira cun balcón. Ten tamén decoración gótica pero no corpo central non hai cornixa, senón unha especie de frontón.