A nave ten cuberta a dúas augas resolta en lousa. A capela maior sobresae do conxunto e está resolta en cuberta a catro augas. Na fachada principal ten adro cuberto soportado por tres columnas toscanas e dúas portas de arco de medio punto con doelas de pedra. Sobre elas atópase a espadana descentrada con respecto ao eixo da igrexa con dous vans con arcos de medio punto. Ten escaleira de pedra de subida ao campanario. No interior conta con tres retablos. O maior é salomónico de comezos do século XVIII con imaxes de San Paulo, San Fiz,  San Miguel, San Brais e San Bieito. O retablo dereito é rococó do século XVIII coa escultura de Nosa Señora do Rosario. O esquerdo, similar ao maior, ten escultura de San Xoán Bautista. Noutro retablo neoclásico atópase unha curiosa imaxe de San Xoán Degolado coa cabeza nas mans do século XVIII.