Para facer esta ruta poderemos chegar co coche xusto ata o punto de partida, onde atoparemos unha zona habilitada como aparcadoiro. De aí parte a senda pola que teremos que camiñar durante aproximadamente 1,5 km. Trátase dunha pista que discorre principalmente entre pinos e eucaliptos e que nos levará directamente ata as pasarelas de madeira.

A primeira parte do paseo non resulta especialmente atractiva pero iso quedará de sobra compensado máis adiante xa que, dende o último treito dende sendeiro, teremos un anticipo das espectaculares vistas do litoral do Vicedo e da ría de Viveiro que poderemos desfrutar en todo o seu esplendor dende punta Socastro, coñecida popularmente como Fuciño do Porco.

A parte final discorre por pasarelas de madeira que soben e baixan en zigue-zague ata o faro-baliza que marca a entrada na ría e o fin deste paseo.

Aínda que a ruta en si é de baixa dificultade, debemos ter en conta que todo o treito que discorre polas pasarelas de madeira é algo máis esixente, e conta con numerosas escaleiras.