Apreciamos un dos poucos puntos do Canón do Sil no que ambas as ribeiras presentan unha fisionomía semellante. Desde aquí obsérvase a central hidroeléctrica de Meixide, (Ourense) e tamén vemos como as ladeiras do canón se suavízan e acollen os viñedos da D.O. Ribeira Sacra. 

O miradoiro sitúase na parroquia que dá nome á subzona dos viños de Sober “Amandi”. Cando o nivel da auga está baixo podemos observar os antigos socalcos que foron engulidos pola construción do encoro e que persisten debaixo da auga. 

O acceso a este miradoiro pasa pola porta dunha das adegas máis grandes da subzona, e desde o miradoiro vemos a desembocadura do río Mao alén do río.