O recibidor de Maruja Limón está presidido por unha obra abstracta realizada con madeira de antigas barricas, ambientando a atmosfera acolledora que se respira en todo o espazo. Este transmite contemporaneidade a través do emprego de mobiliario de madeira e de metal, realzado cunha luz cálida, que no caso da sala focalízase sobre cada mesa.

    Este proxecto gastronómico é unha iniciativa de Rafa Centeno, que leva á fronte do mesmo dende fai máis de vinte anos. De formación autodidacta, este cociñeiro define a súa proposta como unha cociña de recordos enfocada a unha clientela local, que se mantivo fiel tras catro cambios de localización por distintos puntos da cidade. Os produtos da ría de Vigo e do campo galego, de tempada e proximidade, son a inspiración para deseñar a carta e dous menús, Esencia Maruja e Maruja en estado puro.

    Este autoaprendizaxe permitiu a Centeno afrontar a súa traxectoria con liberdade e evolucionar coa cidade e cos clientes, nos que nota tamén unha adquisición de cultura gastronómica. A tradición culinaria das receitas caseiras é unha das bases sobre as que se sustenta esta iniciativa. Reinterpretar un prato como a caldeirada sen que perda a súa esencia é unha forma de evocar recordos entre quen senta á mesa en Maruja Limón.

    Cabe destacar o incremento nos últimos anos de comensais interesados en gozar da gastronomía dende distintas perspectivas. Isto está relacionado coa evolución da restauración cara a unha concepción global, onde se dá importancia á cociña, pero tamén á sala e a outros moitos aspectos, entre os que prima o recoñecemento do traballo de cada un dos membros do equipo.

    Aínda que en cociña decántanse por produtos locais, tamén incorporan de forma puntual recursos doutras cociñas que acomodan á súa identidade. Esta refórzase coa colaboración con artesáns galegos e vigueses, como os cesteiros, á hora de deseñar pezas de vaixelas ou útiles empregados na presentación dos pases.

    O restaurante, aposta pola comida saudable, é o primeiro obxectivo no que basean a súa oferta. Por iso eluden as modas e analizan os beneficios de cada alimento, por exemplo o emprego das algas e o seu aproveitamento para a alimentación.

    Centeno describe o momento actual da restauración galega como máxico, xa que ofrece moitas oportunidades a nivel de produto, de alimentación ou de viños para quen queira dedicarse profesionalmente a este sector, contando cunha clientela cada vez máis receptiva. Esta circunstancia, complementada coa riqueza patrimonial, natural e cultural, converte a Galicia nun destino cada vez máis apetecible para os visitantes.