Templo de grande interese arquitectónico. Data do século XVI e mide uns 32 m de longo por 14 de ancho. A torre levantouse no XVIII e a sancristía e capelas laterais son de construción máis recente. Consta de planta de cruz latina cun brazo transversal moi curto. As naves constan de bóvedas de canón sobre arcos de medio punto e o cruceiro presenta bóveda de aresta. A fachada principal reconstruíuse no século XVIII, coa torre campanario no eixe. A cuberta é a dúas augas e ao seu carón destaca o cruceiro.