Cruceiro de tipo de Crucifixo con plataforma cuadrangular dun chanzo e pedestal cuadrangular achafranado e na que vai unha mesa acaroada.

O varal é octogonal empezando en cadrado na que ten unha inscrición que pon:”A 1797″.  O capitel é octogonal, con astrágalo octogonal e liso, ábaco de lados curvos e vértices achafranados. Ten volutas, caras e follas de cantos lobulados. A súa cruz é octogonal con remates florenzados e botón central. Polo anverso da cruz presenta a Cristo Crucificado con tres cravos e as mans abertas. Inclina a cabeza cara á dereita sen coroa de espiñas e cunha cartela coas siglas INRI. O seu pano de pureza vai anoado á dereita. Polo reverso da cruz fica a Virxe en actitude de orar coas mans xuntas sobre unha peaña. O cruceiro é todo de granito.