O pequeno lugar de Santa Cristiña é un interesante conxunto etnográfico no que ademais de diferentes construcións como un antigo curro, hórreos, eiras ou a fonte milagreira pódese ver unha pequena capela. O culto a Santa Cristiña está directamente ligado coa tradición agraria da zona. Baixo o altar da capela hai un pequeno oco tapado cheo de terra sagrada á que se lle atribúen propiedades curativas para as vacas. A tradición manda coller unha presa de terra e pendurala no pescozo das vacas durante nove días. Con esta fórmula procúrase conseguir que a vaca estea libre de enfermidades e que teña bos partos. Unha vez pasado este período de tempo, a terra debe ser devolta á ermida, e seguindo a tradición débese dar unha esmola á santa na troca da axuda.