A igrexa nova de Maniños, de estilo contemporáneo, é o único edificio relixioso do concello que afasta as súas formas do tradicional barroco rural predominante na zona. Trátase dun edificio de desenvolvemento lonxitudinal, con cuberta a dúas augas perpendicular á fachada. Nesta é patente a combinación da tradición coa modernidade: a tradición nos materiais (revocadura e pedra como nas igrexas rurais) e a contemporaneidade a través das formas e da súa xeometrización. A arquitrabe domina nesta fachada, na que cómpre subliñar o xeito orixinal de situar a cruz, sobresaíndo da cuberta en alongado contraste coa masa horizontal que lle serve de arranque.