Edificación promovida por Antonio Fernández, emigrado á Arxentina e máis coñecido en Ribadeo como Antonio de los Enanos. Trátase dun exemplo típico de arquitectura rexionalista inspirada en elementos autóctonos, reflectidos, por exemplo, na torre cadrada que recorda á dos pazos e na sobriedade decorativa. Se ben, incorpora formas e tendencias modernas, como son o xardín ou a apertura cara ao exterior con grandes ventás e balcóns.

A fórmula arquitectónica que moitos indianos empregaban para demostrar o éxito, o poder, a seguridade e a estabilidade económica queda patente nos pináculos da torre, os fortes aleiros, o aspecto sólido, a ausencia de curvas e a sobriedade das cores entre outros detalles.
Este inmoble forma parte da Ruta dos Indianos.