Vivenda indiana construída en 1926 polo irmán de Manuel López Fernández emigrado a Cuba. A pesar da súa sobriedade observamos unha importante cantidade de elementos que a diferencian das demais edificacións tradicionais da contorna: balcón presidencial sobre sólidas columnas coroadas con capiteis, frontón triangular de proporcións neoclásicas que incorpora unha inscrición co nome da vivenda, molduras sobre as ventás e cornixa rematando a fachada. Pechando a finca álzase un enreixado que completa a elegancia da vivenda e pecha un xardín con presenza de típicas especies vexetais de importación americana.
Forma parte da Ruta dos Indianos polas parroquias.