Situado nunha das rúas máis concorridas da cidade, a rúa do Príncipe, Silabario ocupa a última planta do edificio da sede do R. C. Celta de Vigo, cuxo teitume acristalado e inclinado cóbrese cunha estrutura en retícula que achega identidade á sala.

    Alberto González Prelcic iniciou este proxecto gastronómico en 2008 en Tui para trasladarse en 2018 a Vigo. Coa elección do nome Silabario fai fincapé na importancia do proceso de aprendizaxe na cociña. Por este motivo, unha parte moi importante do seu traballo é investigar sobre os sabores e as técnicas da cociña tradicional galega, apostar polo que a diferenza.

    Aínda que recoñece que é permeable a métodos ou propostas culinarias doutras latitudes, o seu traballo céntrase no produto local, abordado con absoluto respecto para non desvirtuar a súa calidade. Os recursos que lle ofrecen a ría de Vigo ou os hortos de proximidade son a garantía que necesita para deseñar a súa oferta. Así mesmo, destaca a importancia de confiar en provedores e distribuidores, que son quen coñece de primeira man a despensa galega e teñen o criterio para definir a mellor selección. Lograr que funcione ben esta engrenaxe é un dos obxectivos do restaurante.

    A clientela de Silabario é maioritariamente local, por iso é polo que hai variedade nos menús, Berbés, Tempo, Raíces, Solaina, e mesmo a posibilidade de elixir á carta. Desta forma, os comensais gozan dunha oferta flexible, dependendo do tempo e do orzamento do que dispoñan, ademais de facilitarlles visitas máis asiduas. Segundo tempada, poderanse degustar lamprea e angulas, dous dos pratos recorrentes que identifican o establecemento.

    Grazas a un frontal acristalado, a adega intégrase visualmente na sala. Nela consérvanse aproximadamente catrocentas referencias de viño, das que ao redor do corenta por cento son galegas. O resto están seleccionadas entre as principais ofertas españolas e internacionais.