Declarado Núcleo de Interese Etnográfico, Seixalbo conserva o aspecto que houbo de ter no medievo, cheo de recunchos e rúas estreitas esperando ser descubertas. Está situado na Vía da Prata-Camiño Mozárabe, no que outrora foi o Camiño Real a Castela, e dá a benvida aos peregrinos que percorren o Camiño de Santiago. Na Idade Media foi terra humilde dedicada ao cultivo de viñedos, na que labregos e xornaleiros traballaban as terras do Cabildo Catedralicio, señor do lugar. A historia lembra os seus habitantes pola honra de seren os primeiros en conseguir a exención dos foros que pagaban polo uso destas terras de propiedade eclesiástica. Conseguírono en 1859, cen anos antes que no resto de Galicia, despois de dúas décadas de preitos contra a Catedral.