Situada sobre unha pequena península (494 ha.) é a única saída ao mar do municipio. A orixe deste núcleo costeiro data da Idade Media, con asentamentos de persoas dedicadas á pesca. A mediados do século XVI chegaron a este enclave mariñeiros vascos para a caza da balea. O licenciado Molina na súa Descripción del Reyno de Galicia (ano 1550) xa falaba do porto baleeiro de Caión. Entre mediados do século XVI e principios do XVIII, baleeiros vascos e caioneses cazaban baleas vascas (Eubalaena glacialis) na costa de Caión. A caza da balea e o seu aproveitamento xerou un importante movemento comercial, dando traballo a moita xente da vila e dos pobos veciños.