Un dos cruceiros máis fermosos da Terra de Soneira é o do Campo de Paizás. Situado enfronte á capela de Santa Mariña chama a atención o seu varal con estrías en forma de espiña de peixe. Érguese sobre unha plataforma octogonal de seis chanzos e sobre un pedestal con caveiras, ósos e unha píntega.
Na cruz, sobre follas e querubíns, a un lado Cristo crucificado con tres cravos e ao outro a Nosa Señora das Dores.
Segundo o historiador Xosé María Lema, pola inscrición na súa base “ARCEDIANO TRASTAMARA” foi realizado no século XVII en tempos de Sancho de Lema, que foi arcediago de Trastámara e fidalgo local.