Igrexa feita con pedras irregulares. Posúe unha ábsida semicircular precedida dun pequeno tramo recto do século XII. Dividida en tres partes por dúas columnas que chegan ata a cornixa, e que posúen capiteis e bases con escasa decoración. Na parte central pódese apreciar unha singular ventá seteira cegada, rodeada por un arco formado por cinco lóbulos, apoiado sobre pequenas columnas con capiteis de grandes follas, fustes e bases lisos. A cornixa norte está decorada con bolas e sostida por canzorros con forma de proa.

No interior, o tramo recto da ábsida cúbrese con bóveda de canón, e o semicircular con bóveda de forno. Conserva un arco triunfal de medio punto apoiado en columnas con capiteis decorados con grandes follas. Na súa fachada destaca a espadana barroca incorporada á románica, así coma un reloxo desprazado cara á dereita.