A data de construción da igrexa é 1179, segundo a inscrición que se pode ver na porta occidental. Dita porta occidental, posúe unha arquivolta lisa que descansa en dúas columnas coas bases enterradas; o mais interesante dela é o tímpano dunha soa peza facendo lintel e con dous lóbulos na parte inferior, sobre os que está a mencionada inscrición. A parte superior do tímpano está decorada con catro arcos e no centro unha estrela de 8 puntas con botón central. Tamén conserva da época románica os muros coas súas cornixas e varios canzorros xeométricos. Os capiteis románicos do arco triunfal exhíbense no museo de Pontevedra. 

Tanto a ábsida como a parte superior da fachada son de época barroca. Conta a tradición que esta igrexa - así como as próximas de Bermés e Rodís - ten lazos templarios, aspecto este do que non hai ningunha proba.