O Parque Natural Serra da Enciña da Lastra debe o seu nome á aciñeira, especie que ocupa a terceira parte da súa área. Posúe máis de 25 especies de orquídeas, máis da metade das citadas en Galicia. Consulta os detalles na páxina web da Consellería de Medio Ambiente.
Foi declarado como tal no ano 2002 e ten unha extensión de 3.151,67 hectáreas. Caracterízase pola presenza de bosques de especies mediterráneas, como a aciñeira ou o érbedo, e tomiñares silvestres, incluíndo especies protexidas como a magarza ou santolina, entre outras. Un punto destacado para os amantes da ornitoloxía é Pena Falcueira, un lugar onde se observan aves rapaces, como a aguia real ou o falcón peregrino. Dentro da súa fauna cómpre sinalar a súa colonia de morcegos, que con nove  especies é a máis variada de Galicia. Outras especies de mamíferos protexidos son a londra e o desmán dos Pirineos. Está habitado tamén por anfibios e réptiles propios de medios secos e pedregosos. Entre os invertebrados inclúense as bolboretas, a vacaloura e o cangrexo de río autóctono, só
presente en poucos puntos das provincias de Lugo e Ourense. Algúns dos peixes dos seus ríos están protexidos, como a boga ou a vermella.