A capela atópase fronte a unha fermosa carballeira, e foi construída no lugar onde se atopaba outra anterior de madeira para oficiar misas nos días de feira. Ten planta rectangular con tellado a dúas augas e a sancristía engadida no extremo e a menor altura. Os muros alternan a cachotaría e o perpiaño, e na fachada principal atopamos a porta no centro, rematada en arco oxival, unha fiestra circular a media altura e a espadana elévase para acoller a campá nun arco de medio punto e sobre unha cornixa, cun remate na punta en pináculo. Os muros laterais da nave están revocados. Na carballeira de Seilán atopamos tamén unha fonte e un cruceiro.