Está situado fronte á capela de Sta. Rosa de Lima, e carece de plataforma, pois o seu varal cilíndrico incrustouse directamente sobre un penedo. O seu capitel é tamén circular, moi moldurado. Sobre el unha cruz sen figuras. 

Este cruceiro foi erguido por un navegante de Laxe apelido “Couceiro”, que facía a ruta de Perú a España, infestada naqueles tempos de piratas. No ano 1676,  este navegante fixéralle a Santa Rosa de Lima unha promesa de que, se daba chegado felizmente á casa, erguería un cruceiro no sitio máis alto da súa vila e depositaría unhas reliquias da santa ós seus pés. Regresou sen contratempos e cumpriu a promesa. 

A “Cruz do Navegante” dominou este lugar en solitario ata 1936. Este cruceiro mudou de aspecto ao longo dos séculos, xa que seguramente a cruz orixinaria era do seculo XVII, e polo ano 1932 esta cruz era de ferro, como o demostra algunhas fotografías tomadas por José Vidal e que forman parte do Arquivo Fotográfico Vidal. Por desgracia, hoxe xa non existe esta cruz artística de ferro, xa que volveu ser substituída en época indeterminada pola actual de pedra.