Discorre polo antigo camiño que unía Cibrisqueiros con San Cosmede. Desde a estrada, nas proximidades dun lavadoiro comunitario, o roteiro se interna entre as casas da aldea. Á altura das últimas edificacións hai unha derivación á dereita ata a fermosa igrexa románica de San Vicente de Pombeiro ( ss. XII-XIII).

Continuando de fronte, tras pasar un arroio, o camiño sobe ata unhas antigas construcións abandonadas. En breve chegaremos ás tumbas de O Preguntoiro, situadas a escasos metros da senda. Son dúas tumbas antropomorfas, unha pequena pila e outros restos, todo escavado en pedra de granito.

Agora as rocas toman o protagonismo, conformando un fermoso camiño. Atoparemos algunha parede preparada para a escalada, así como penedos de curiosas formas alveoladas. A continuación, o roteiro descende por Penaveada cara á pequena capela de San Cosmede, na que se venera á Virxe das Dores. Seguindo un tramo entre viñedos e vellos muros de pedra, chégase á próxima aldea de San Cosmede.

As árbores deixarannos ver o Canón do Sil en contadas ocasións, pero percorrer o roteiro no outono e primavera será un deleite para os sentidos debido ás marabillosas tonalidades da vexetación.