Bosque de ribeira das Terras do Mandeo

Accedemos a este paseo fluvial do río Carregal dende Teixeiro, vindo do centro urbán por unha pista asfaltada á esquerda despois do paso inferior da vía do ferrocarril. Atopamos á esquerda novamente unha zona de aparcadoiro e área de lecer. Aquí comezamos a nosa andaina seguindo o curso do río Carregal. En épocas chuviosas pode mesmo rebordar ou inundar a zona boscosa de ribeira a ambos lados do camiño.

Seguimos o serpenteante curso pasando debaixo da vía do tren. Logo atoparemos unha derivación ata o moderno Centro Etnográfico do río Mandeo, que alberga varios paneis explicativos do patrimonio natural, monumental e cultural da contorna, así comxo un vídeo sobre a cultura castrexa e outros elementos interactivos. O paseo remata á beira da estrada N-634, polo que retomaremos os nosos pasos ata volver ao aparcadoiro onde deixamos o noso vehículo.

1,28 km (só ida)

(+0,35 km derivación, só ida)

Aparcadoiro do paseo fluvial (43°08'31.74''N / 8°02'33.88''O)

Estrada N-634 (43°08'00.77''N / 8°02'16.58''O)