Paseo termal do río Miño

Esta ruta lineal de apenas 2 km comeza na área termal de Barbantes, que conta con varias piscinas de augas hipotermais e servizos turísticos estacionais. É perfectamente apta para facela en familia, xa que é totalmente chaira, e recomendable tamén para bicicletas.

Baixo o nome de ruta do Miño, a senda non ten perda, contando con algunhas balizas de sinalización e paneis explicativos sobre a fauna e flora que podemos atopar no noso percorrido. Primeiro entramos nunha zona boscosa na que veremos algún exemplar de sobreira, acivros, pero que está dominada pola presenza de carballos máis ben novos, que permitirán protexernos nos días de extrema calor que se dan na bacía do río Miño.

Logo imos pola beira do río, tratando de albiscar anátidas, garzas ou corvos mariños, que aproveitan as súas ribeiras para agocharse. E de seguido atoparemos as instalacións da vila termal de Laias onde remataremos este paseo ao pé da ermida de San Bieito.

Área termal Barbantes (42°19'57.37''N / 8°00'47.10''O)

Vila termal Laias (42°19'36.78''N / 8°01'51.10''O)