Brais Pichel inaugurou o seu proxecto gastronómico en 2021, fronte á praia da Ribeira, na súa Fisterra natal. Con só dous anos de traxectoria, a proposta culinaria de Terra foi recoñecida pola crítica especializada e é a máis recente incorporación á selección de restaurantes galegos distinguidos cunha estrela Michelín.

    O nome de Terra ten un triplo significado: fai unha homenaxe á toponimia local, fai alusión á orixe dos recursos e incide na importancia de manter os pés na terra.

    Con Gabriel Díaz como man dereita, este chef busca inspiración nos produtos de cada estación. O peixe e o marisco, procedentes da lonxa situada a poucos metros do restaurante, son imprescindibles na súa proposta, así como as verduras e as hortalizas, que xogan un papel fundamental no deseño de cada prato. A importancia dada aos vexetais reforzarase en breve coa creación dun invernadoiro, onde se primarán os cultivos menos habituais no mercado.

    Os comensais que acudan a Terra gozarán dun menú duns catorce pratos adaptados á dispoñibilidade dos produtos. Conseguir o máximo sabor a través da busca de matices é o obxectivo do chef.

    Para iso, a cociña investiga a elaboración de fermentos, vinagres e maceracións, como o garo de lura, o miso de garavanzo negro e o uso de follas de figueira, piñeiro ou cervexa. Este tipo de preparacións, ademais de favorecer o aproveitamento dos recursos, dá moito xogo á hora de ultimar aderezos e salsas.

    Pichel considera imprescindible o contacto directo con pequenos provedores e produtores, que o fornecen de pan, de cordeiro e de vexetais da mellor calidade. Co mesmo criterio, selecciona a carta de viños, con referencias galegas, canarias e francesas, ou escolle a vaixela, elaborada artesanalmente en Buño, importante centro cerámico da Costa da Morte.

    Interesado pola tendencia gastronómica centroeuropea baseada na sinxeleza e o vínculo directo coa natureza, este chef aposta por traballar cun equipo reducido e respectando os tempos, as singularidades de cada lugar e o traslado que, ao seu xuízo, ofrece moitas posibilidades para desenvolver iniciativas como as que el promove.