Igrexa de estilo barroco. Planta rectangular de nave única. O interior da nave está cuberto por unha bóveda rebaixada. O espazo correspondente ao presbiterio está delimitado por un arco triunfal de medio punto.

A fachada principal presenta unha porta rectangular con lintel decorado, enriba ten unha fornela coa imaxe de Santiago, que porta atributos peregrinos, e un oco rectangular que permite a iluminación natural. Pilastras enmarcando todos estes elementos, sobre as que se apoia un frontón curvo partido no seu centro. Nunha esquina da fachada destaca a torre campanario con tres corpos. Conta cun interesante retablo barroco no altar maior.