Ao longo da rúa da Travesía da Mariña, xusto en fronte da ría de Viveiro, atopámonos con numerosas casas seguidas con típicas galerías, que se van repetir en toda a urbe de Viveiro así como noutras cidades costeiras de Galicia. Presentan grande homoxeneidade de materiais e formas, construídas con cadeirado de granito e entrepanos de cachotaría, con cuberta de lousa e galerías de madeira ou pvc que ocupan a parte frontal das casas, que adoitan presentar tres ou catro pisos. As brancas galerías ocupan, ou ben todas as plantas -exceptuando a primeira- ou ben as plantas superiores de cada casa.