Capela relacionada cos cultos primitivos ao poder curativo da auga. A capela maior é singular porque se cobre cunha bóveda de cruzaría, única na comarca, que foi construída no século XVI. A fachada, de boa cantería, contrasta cos muros de cachotería con cal.

Esta capela, fundada por Juan Prego de Montaos en 1593, conforma un importante santuario xunto coa fonte santa de Rubín. Aínda que é coñecida polos veciños como a Capela de Rubín, a súa advocación é a de Nosa Señora de Saúde, da que existe unha imaxe no seu interior, así como tamén un San Miguel chamado popularmente como o demo de Rubín, e unha imaxe de Nosa Señora da Pascua.