Esta igrexa, de grande sinxeleza nos seus muros, presenta unha rica volumetría exterior. A planta, de forma rectangular, ten unha soa nave moi alongada, e está dividida en cinco tramos por arcos de medio punto rebaixados que arrancan dende unha cornixa a xeito de imposta. O cuarto tramo cóbrese cunha bóveda de cruzaría, produto do cruzamento das dúas bóvedas de canón, a da nave principal e a das dúas capelas laterais, que apenas sobresaen dos muros laterais. Na entrada da igrexa atópase a tribuna, feita en fábrica de cantería e que se apoia nun arco rebaixado que descansa en ménsulas nos muros. Os muros son de cantería de granito e as cubertas de tella. O cruceiro atópase iluminado por pequenas ventás que se abren nos seus catro lados. O ciborio, destaca volumetricamente do conxunto ao ser o corpo máis alto. A fachada é moi sinxela e simétrica na súa composición. Posúe unha porta rectangular con molduras no lintel e as xambas, e unha ventá situada enriba para iluminar a tribuna. A cornixa, a dúas augas con pináculos nos extremos, non chega a unirse no vértice por situarse a torre-campanario barroca. Levántase sobre unha base cadrada, con cornixa, o seguinte corpo componse de catro machóns unidos por arcos de medio punto. O último corpo, unha cúpula, arranca dunha cornixa con pináculos.